Geir to the rescue ... Eða er það ekki annars ?

Þá er kominn á sjónarsviðið björgunarpakki ríkisstjórnarinnar.  Sýnist við fyrstu sýn að þetta þýði fyrir einhverjar fjölskyldur að í stað þess að verða algerlega 100% gersamlega gjaldþrota ...  þá verða þær bara gjaldþrota !!

Ætla samt ekki að halda því fram að þetta sé allt handónýtt en ég er ekki viss um að þetta sé nóg.  En afhverju var byrjað á þessum enda?  Afhverju er ekki byrjað á því að tryggja fólkinu vinnu?  Það skiptir voða litlu máli þegar fólk er að reka bíl, hús, krakka og ég veit ekki hvað hvort það fái 10% afslátt á einhverjum lánum (í bili) þegar það er atvinnulaust.

Svo þegar Master Geir segjir að kreppan sé búin þá þarf fólkið að borga þennann afslátt til baka án þess að fá lengingu lána.  Allt í góðu og örugglega sjálfsagt að borga þetta.  En að borga bara helmingin af hvítunni úr augunum núna og restina seinna ...  Er ekki viss.  Ég hefði viljað sjá hærri tölur samfara lengingu lána.  Einnig hefði ég viljað sjá í staðin fyrir 10% afslátt af síhækkandi verðbólgu einhverja fasta tölu.  Ef þú ert með verðtryggt lán og borgaðir í 5% verðbólgu 1oo.ooo kall þá borgar þú bara 1oo.ooo kall út kreppuna.  (Svona eitthvað dæmi út í loftið).  Auðvitað "kostar" þetta meira fyrir ríkið (mig) en þetta myndi að mínu mati í alvörunni hjálpa fólki.

 

Bílarnir ...  Smávegis hækkun á endurgreiðslu gjalda ef þú selur bílinn þinn úr landi ...  OK flott mál ...  nema hvað eigandinn af bílnum fá peninginn.  Rétt upp hendi sem á bílinn sem hann ekur um á ...    Það verður greinilega góður hagnaður hjá Lýsingu, SP og þessum öllum fyrirtækjum á næsta ári.

 

Barnabætur mánaðarlega í stað 3ja ...  Gæti hjálpað en engin töfralausn.

 

Svo á að spara einhverjar krónur með því að fá ekki Bretana til að "verja" okkur hryðjuverkamennina ... Skrítið.

 

Í öðrum fréttum ...  Sjálfstæðið ætlað að skoða Evrópu.  Margir hissa á því að þegar 70% þjóðarinnar "vill" ganga inn í þetta þá ætla þeir að stofna nefnd.  Setti þetta í gæsalappir þar sem ég tek ekki mark á þessari skoðanakönnun frekar en mörgum öðrum.  Helgast kannski út af gamalli "skoðanakönnun" þegar 11,7% aðspurðra höfðu heyrt nafn á einhverju landsvæði sem stóð til að virkja (þ.e.a.s. heyrt um það áður en "allir" voru að tala um það, 5,78% aðspurðra vissu nokkurnvegin hvar þetta landsvæði væri á skerinu, en samt voru 69,67% alveg handviss um að það væri glapræði að smíða virkjun þar.

 

Það gæti orðið fróðlegt að sjá hvað gerist í mótmælum dagsins.  Vona að Hörður Torfa og félagar nái að halda sín mótmæli í friði þar sem það er í sjálfu sér bara skemmtileg samkoma.  Ekki skilja þetta bókstaflega samt ...  Fátt skemmtilegt við þessa tíma.  Grunar einhvernvegin að það verði einhver skrílslæti eins og síðast, en er að vona að þeir einstaklingar fari ekki að skemma fyrir "góðu" mótmælunum.

 

Svo að lokum ein spurning sem ég hef verið að velta fyrir mér við lestur bloggsíðna undanfarið ...  Hver er þessi Björgúlfur sem allir eru að tala um??  Er farinn að halda að ég sé svona vitlaus að vita það ekki.

 

 

 

 

Ný greiðslujöfnunarvísitala tekin upp

Bökum brauð til að mótmæla hveitiverði

Umhverfisssinnar mótmæla álverum með því að vefja álpappír utanum styttur

Atvinnubílstjórar mótmæla eldsneytisverði með því að eyða (óþarfa??) eldsneyti í að aka á staði sem þeir hefðu ekki farið á annars.

Bakarar mótmæla hækkandi hveitiverði með því að baka fleiri brauð.

Landinn drekkur meira whishey til að mótmæla hækkandi byggverði

 

 

Þar sem "allir" virðast núna vera allsvakalega uppteknir af mótmælum út af hækkandi eldsneytisverði þá datt mér það í hug að fara aðeins á stúfana og kanna eldsneytisverð í nokkrum löndum.  Svosem verið gert áður þannig að ég er ekkert að finna upp hjólið hérna.  Þær síður sem ég notaði við leitina eru hérna fyrir neðan og svo kemur einhverskonar niðurstaða þar fyrir neðan.

 

 

Eldsneytisverð í Noregi: http://www.dinside.no/php/oko/bensin/vis_prisliste.php

Eldsneytisverð í Danmörku: http://www.fdmbenzinpriser.dk/

Eldsneytisverð í Svíþjóð: http://www.bensinpriser.se/default.asp

Eldsneytisverð í Bretlandi: http://www.petrolprices.com/

Gengisskráning Seðlabanka Íslands:  http://sedlabanki.is/?PageID=7

Atlantsolía:  http://atlantsolia.is

Egó: http://ego.is

ÓB: http://www.ob.is/eldsneytisverd/

 

 

Það eru ýmis verð í gangi í þessum löndum og því tók ég bara lægstu og hæðstu verð sem ég fann á þessum síðum og þá er útkoman einhvernvegin svona

 

Bensín 95 oktana

 

Ísland: 143,9 - 145,9

Noregur: 155,78 - 191.93

Danmörk: 162,78 - 165,25

Svíþjóð: 144,63 - 145,99 

Bretland 149,49 - 171,06

 

Diesel

 

Ísland:  153,0 - 157,0

Noregur: 155,78 - 194,69

Danmörk: 157,05 - 161,38

Svíþjóð: 121,94 - 138,63

Bretland: 160,99 - 184,01

 

 

Eins og sést hérna þá erum við bara alls ekkert í neitt slæmum málum miðað við úrtakslöndin.  Auðvitað gæti ég komið með tölur frá öðrum löndum eins og Grikklandi þar sem verðlag á svo til öllu held ég er lægra en alls staðar annarstaðar.  En ég held að það hefði bara gefið óraunhæfar niðurstöður.

Því áhvað ég það bara að þetta væru nokkuð samanburðarhæf lönd og lét þar við sitja.

Nú, eins og ég sagði þá komum við ekkert illa út úr þessu.  Eina talan sem sker sig eitthvað úr að ráði er dieselverð í Svíþjóð.  Grunar að það sé eitthvað með skattamál að gera en get þó ekki fullyrt neitt um það.

 

En auðvitað er það allt satt og rétt sem heyrst hefur í þjóðfélaginu að eldsneytisverð hefur hækkað allsvakalega undarfarið.  En er það eitthvað sem ríkisstjórn Íslands á að skipta sér að ?  Á ríkið að niðurgreiða eldsneyti svo landinn geti keyrt meira ?  Á ríkið að niðurgreiða hveiti og hrísgrjón þegar þær hækkanir fara að hafa áhrif hérna á skerinu  (Ef það er þá ekki byrjað)? Á ríkið að niðurgreiða veiðileyfi í laxveiðiár svo ég og aðrir í hópi sauðsvarta "pöpulins" tími að flengja sprænur með flugu?  Hvað með ef að byggverð hækkar ...  Á ríkið að niðurgreiða bjór og Whiskey svo ég geti drukkið meira ?

Á ríkið að byggja fleiri golfvelli í nágrenni stórhafnarfjarðarsvæðisins til að minnka biðlistana í golffélögin ?

 

Hvar liggja mörkin á milli skynsamlegra og óskynsamlegra mótmæla?

 

Hér kemur mín túlkun á þessu öllu saman.

Verktaki sendir inn tilboð um að gera eitthvað verk fyrir milljón kall.  Væntanlega hefur hann við tilboðið gert ráð fyrir eldsneytiskosnaði, launagreiðslum, eðlilegu viðhaldi á tólum og tækjum og svo allavega gjöldum sem falla til við svona aðgerð.  Gefum okkur að verktakinn hafi áætlað sem svo að heildargróðinn úr þessu verki sé 1oo.ooo kall.  Núna hækkar innkaupsverðið á dieselolíu hjá Esso um x margar krónur.  Ofan á það bætist svo X margar krónur í vask.  (Þungaskatturinn og olíugjaldið er að mig minnir föst krónutala).

Núna gefur það auga leið að hagnaðurinn af verkinu minnkar.  Og þar sem upphaflega var samið um fasta krónutölu í verkið þá er væntanlega ekkert við því að gera og verktakinn verður einfaldlega að bíta í það súra.  Þarna eru mótmæli mjög skiljanleg og það má vel færa rök fyrir því að þau séu skynsamleg.

 

Svo er kannski einhver sem vinnur hjá þessum verktaka.  Hann hefur dágóða  bíladellu og þegar gengið var hagstætt þá keypti hann sér nýjan Cruiser og lét breyta honum fyrir segjum 1.5oo.ooo svo hann gæti spænt upp á jökla.  Svo hækkar gengið þannig að í stað þess að borga 9o.ooo af bílaláninu þá þarf hann núna að borga 12o.ooo.  Svo bætist auðvitað hækkandi eldsneytisverð við þannig að staðan er þannig að Cruiserinn stendur bara heima í hlaði og umráðamaðurinn hefur ekki efni á því að fara á fjöll.  (Nota hér umráðamaður þar sem bankinn er hinn raunverulegi eigandi).  Mótmæli í þessu tilfelli eru alls ekki skynsamleg.  Ég tel einnig að þau séu ekki skiljanleg.

 

Auðvitað bölva allir í hljóði yfir hækkandi eldsneytisverði.  Ég játa það hiklaust að ég geri það.  En það er greinilegur munur á að mótmæla einhverju sem hefur bein áhrif á rekstur þíns fyrirtækis eða að mótmæla því að þú getir ekki stundað þitt hobby eins mikið og þú kannski vilt.

 

Vörubílstjórar hafa að mínu viti allan rétt til að mótmæla.  Ég er að vísu ekki eins viss hversu lengi þeir eiga að halda áfram.  Þeir eru búnir að koma sínum sjónarmiðum á framfæri og mér finnst það vera spurning hvort þeir ættu ekki að taka sér smá pásu núna og reyna frekar að knýja á að vinnunni sé flýtt.  Hr. Möller segjir að það sé verið að vinna í því að fá reglum um hvíldartíma breytt.  Það er gott og vel.  Auðvitað tekur það einhvern tíma en það má örugglega stytta hann eitthvað með einbeittum vinnubrögðum.  Þarna kemur eitthvað sem heita samningar að góðum notum held ég.  Vörubílstjórar hætta mótmælum gegn því að vinnunni sé hraðað eins mikið og unnt er.  Einhverstaðar heyrði ég um daginn að það ætti að vera hægt að breyta þessu upp í ráðuneyti með einu pennastriki eins og gert var með loðnukvótann núna á nýlokinni vertíð (ef vertíð skyldi kalla).  Ég held að það sé bull.  Loðnudæmið þurfti ekki að fara í gegnum nefnir og ráð í skriffinskubákninu í hinu háa Brussel.  Hvíldartímabreytingin mun alltaf taka lengri tíma og það verða menn að skilja.  En ég er alls ekkert viss um að "handrukkunaraðferðin" virki á Brussel.  Þannig að verum núna góðir strákar og lofum mönnunum að vinna í friði.  Þó ekki væri nema í smá tíma.

 

Annars er það umhugsunarefni afhverju það er að ef að það koma drög af einhverjum reglum í Brussel þá eru þau komin í lög hér daginn eftir ...  En það er efni í annann pistil. 

 

Fleira er ekki í fréttum